March 16 In 24 Tiang Gangaw Peng Kahdohnak Ah SAC Ralkap 5 An Thi I PDF 8 An Nunnak A Liam

Magwe ramthen, Gangaw peng ah March 16 in 24 tiang SAC ralkap le Yaw PDF kar kahdohnak ah SAC ralkap 5 an thi i Yaw PDF minung 8 an nunnak a liam tiah Yaw PDF nih March 27 ah an thanh.

March 16 ah pyosawthi nih an ukmi khua pawng ah Yaw PDF tat-khuai 1kah- duh tatseihhmu(တပ်ခွဲ-၁ က ဒတပ်စိတ်မှူး)cu bomb a hmanh lio ah a puak sual i a nunnak a liam. Cun March 17 zing Sml 4 hrawng ah Yaw PDF nih south Khinyian(တောင်ခင်ရန်း) palek sakhan cu hriamngan in an kah i kaphnih kar kahdohnak a chuak. March 18 zong ah pyosawthi nih an uk mi north Khinyian khua cu Yaw PDF le tangrual phu nih an doh hna i kahdohnak a chuak fawn. Cu kahdohnak ah SAC ralkap lei nih hriam ngan in an kah hna caah mipi veng tu ralkap 1 a nunnak a liam i a dang 1 hliam a tuar tiah theih a si.

March 20 le 21 ah south Khinyian palek sakhan in a ra mi SAC ralkap le pyosawthi phu thazaang 120 tluk cu Gangaw PDF tangrual phu nih an doh hna.

March 21 kahdohnak ah SAC ralkap cu Yaw PDF lei nih drone in bomb an thlak hnawh hna. Cun kutser 60mm(မမ) in an kah hna i SAC ralkap captain 1 hliam tuar i 5 an thi. March 22 ah south Khinyian palek sakhan in SAC lei hriamngan le sniper ruangah Yaw PDF minung 6 an nunnak a liam ve tiah theih a si.

March 22 le 23 ah minung thazaang 200 tluk he Hnamkha(နှမ်းခါး) khua lei ah rallam a sial mi SAC ralkap hna cu PDF phu he chikhat kahdohnak a chuah hnu ah SAC ralkap nih Hnamkha, Yehlah(ရဲလှ), Chaungkok(ချောင်းကောက်), le Thase(သာစည်) khua in inn 40, lothlam 2 le motor 1 an khangh tiah Gangaw PDF nih an thanh.

March 24 ah cun SAC ralkap hna cu Hmuaihlay(မွှေ့လယ်) le Moeso(မိုးစို) khua lei ah rallam an sial ruang ah. Yaw PDF nih an i doh than hna nain ralhriam thazaang aa thlau tuk ruang ah hnu an tolh than tiah theih a si. Kahdohnak a dih hnu ah SAC ralkap nih Moeso khua inn 90 le Hmuaihlay khua inn 6 an khangh i Hmuaihlay khuami pakhat zong an thah ta tiah Yaw PDF nih an chim.

Tu chung hrawng hi Gangaw chaklei kap khua pawl ah SAC nih rallam an sial i inn an khangh piak hna ruang ah tualchung mipi hna cu a himnak ah an zam tiah theih a si.

Be the first to comment

Leave a Reply

Your email address will not be published.


*