Sianginn a kai kho lomi hngakchia 8 million hrawng an um tiah Save the Children nih a thanh

A luancia kum hnih chungah Covid-19 rai ruang le ralkap nih hramhram in uknak a lak hnu ah a chuakmi buainak ruangah sianginn pawl khar a si i sianginn a kai kho lomi hngakchia a zat hi lethnih a karh caah cheukhat hmunhma hna ahcun sianginn apnak zatuak 80% tiang a ṭum tiah June 1 ah Save the Children nih a thanh. A tulio caan ah, hngakchia 7.8 million hrawng a leng ah an tlong sawhsawh tiah a chim.

A luancia kum chungah sianginn, saya/mah te siahngakchia pawl kahdohnak an ton caah siahngakchia a tam deuh cu sianginn an kai ngam ti lo, cheukhat hmunhma hna ahcun sianginn hna a um ti lo ruangah a si tiah a thanh.

2021 May thla thok in 2022 April thla tiangah sianginn chungah kahdohnak voi 260 a cang i cu chung ah sianginn 190 hi cu sianginn tual chung le a pawngkam ah puahnak a chuah hi a si. Cubantuk in, sianginn tual chungah a puak khomi thilrii voi 4 hmuh a si, sianginn hi voi 33 khanghpiak a si i siangcachim le sianginn rianṭuantu pawl kahdohnak hi voi 10 a cang. Atu March le May thla chung lawngah sianginn chungah hriamtlai phu pawl nih hmunhma khuarnak an tuah hi voi 10 a si cang tiah Save the Children cathanhnak ah aa tel chih.

Sianginn lengah a tlong sawhsawhmi million tampi hngakchia hna sianginn kai kho ṭhan ding in tuahpiak an si lo ahcun hramhram in rianṭuanternak telh in no lio te ah i ṭhitumnak a chuak kho. Cucaah, hriamtlai phu hna nih sianginn pawl kahdohnak tuah bak lo ding in Save the Children nih nawlnak zong a tuah chih.

Be the first to comment

Leave a Reply

Your email address will not be published.


*