Kan Chin Ralkap pawl hi Naboth le Samaria Mitha pa he Ka Lawhtertuk hna

Kan Chin Ralkap pawl hi Naboth le Samaria Mitha pa he Ka Lawhtertuk hna
***********************************
✍️ Siangpahrang Ahab nih, “Na mitsur dum hi ka inn pawngah a um caah anhringso dum ah ka pe. Amah can ah adang kan pek lai, silole na duh ahcun tangka in kan pek lai”, tiah Naboth a ti. “Ka pupa ro mitsur dum kan pek ding cu Bawipa nih ka kham ko seh. Ka siang lo bo, kan pe lo hrim lai”, tiah Naboth nih a leh. Pupa ro mitsur dum dawh cu mi kut cung phak a sianlo caah a ngeihchunmi nunnak pek in a ven.
✍️ Chinmi kan mitsur dum cu Chinram a si. Cucu Pathian pekmi kan popa hna ro a si. Chinmi nih kan ngeihchunmi kan mitsur dum a vengtu hna cu kan ralkap hna hi an si. An ngeihhlei si loin an ngeihchunmi nunnak thap in an ven. Cucaah pupa ro mitsur dum a vengtu Naboth he ka lawhter khuntuk hna. Upat tlak an si. An tuanbia chim kan dai lai lo.
✍️ Misual nih an vuak i minung hmanh lo ti lo lak in lamlai ah a ril komi pa kha a hrialtu an um. Ka zuan hnawh ahcun keimah lehlam an ka vuak ve sual lai, ti an phan ruangah a si kho. An vuakmi pa a himnak nakin anmah himnak ding an ruah ruang zongah a si kho. Sihmanhsehlaw mi pakhat nih a rak zuanhnawh i a bawmh. Keimah nih ka zuanhnawh lo ahcun a thi sual lai, ti a phang. Cucu Samaria mitha pa a si.
✍️ Kan Chinram hi rallokap nih an vuak cuahmah i zuanhnawh a herh ngai lio caan a si. Lai hlum leng le val zeimaw zat nih an zuanhnawh ngam lo. Micheu nih Malaysia kalnak in an hrial. Cucu keimah lehlam ka thi sual lai, ti an phan ruangah a si kho. An himnak ding an kawl, hei ti ko usih.
✍️ Cu lio ah Samaria mitha pa lungput ngei in a zuanhnawhtu zeimaw zat an um ve. Keimah nih ka zuanhnawh i ka ven lo ahcun…, timi lungput he an ven. Cu hna cu kan Chin ralkap hna hi an si. Kan miphun le kan ram caah Samaria mitha pa he ka lawhter khuntuk hna. Upat an tlak. An kong chim kan dai lai lo.
Markita Mualhlun

Be the first to comment

Leave a Reply

Your email address will not be published.


*