Ralkap Hlun pawl Ralkap Tla than dingin Putin nih Nawl a Chuah

Ralkap Hlun pawl Ralkap Tla than dingin Putin nih Nawl a Chuah
==================================================

Ralkap hlun pawl ralkap tla than dingin Putin nih nawl a chuah hi WW2 hnu in avoikhatnak bak a si. Nitlak ram nih nuclear in kah an kan timh ah cun, kan i ngeihmi hriamnam nganbik in i runvennak kan tuah ve ko lai, tiin Putin nih ralrin a pek hna.

US nak hmanh in nuclear warhead tamdeuh a ngeimi Russia ram a hruaitu nih a tu bantuk in ralrinpeknak a tuahmi hi Ukraine ral a thawh hnu ah a nganbikmi i thiamlonak a hung si. Mah ti ralrinpeknak a tuah le cangka, ralkap ai chiahmi chungin minung 300,000 (tingthum) hman dingin biachahnak a tuah colh.

“Kan ram chung hmunhma pakhatkhat hnursuan a si ah cun, Russia le kan mipi hna runven awkah loh theih lo in hmantlak a si mi hriamnam vialte kan hman hrimhrim hna lai – hihi kan biaka lawng a si lo,” tiin TV in a rammi sin bia a chimnak ah Putin nih a chim.

Nitlak ram hna nih ‘nuclear ral tho dingin Russia an hrocer’ mi kongah Putin nih sual a phawt ngaingai hna. NATO a hruaitu ram pawl nih nuclear in Russia kah dingin khua an khan, tiin a chim.

Russia kut tang a phan cang ko mi Zaporizhzhia nuclear power plant cu Nitlak ram pawl nih Ukraine an kahter caah, ‘nuclear ruang i puicimhnak’ tlunter an timh, tiin Putin nih a chim.

Russia kut a phanmi Ukraine pengkulh le khua kipah Referendum (Russia he i peh dingin mipi duhnak vote laknak) tuah dingin Putin nih hna a tlakpi hna. Ukraine ram an lakmi hi Hungary tluk in a kau i, cu ti referendum tuah a timhmi nih hin hi hmunhma pawl hi a ram ah ser a timh, tinak a langhter. Russia ram a hrawh in hrawh lawlaw hi Nitlak ram pawl an duhnak a si, tiin Putin nih a chim.

Nitlak ram pawl nih cun anti-Russian policy an i hman i, ri a si mi paoh an pah dih cang. Thlitu hi a hrannak ai thleng tawn, ti hi Nuclear in a kan hrocermi hna nih an theih awk a si, tiin Putin nih a chim.

1962 Cuban Missile Crisis hnu ah tutan ral hi Nitlak ram he a linsabikmi i dironhnak a si i, minung a thong a sang in an thi, vawleicung chawlehthalnak tiang in puicimhnak fakpiin a tlunter.

Minung tampi a that khotu, asiloah conventional hriamnam in Russia kah a si ah cun a nuclear hrimnam hmang dingin Russia nih phung ai ngeih.

Russia ralkap a tuan thingmi hna cu ralkap tla than dingin Putin nih nawl a chuah.

Mah hi ralkap luh sawmnak hi Russia ralkap a rak lut balmi hna vung sawm khi a si; mi thar vung sawm khi a si lo.

Ram chungah a ummi kan ralkap hlun hi an dih lakah minung 25 million hrawng an si i, cu hna lakin cun a tlawmbik 300,000 (tingthum) hrawng cu kan hmuh khawh ko lai, tiin Russia defense minister Sergei Shoigu nih a chim.

Nizan i Ukraine in hmunhma 4 in Russia a tanhtu (pro-Russian) bawi pawl nih Russia he i peh lawlaw dingin nawlnak an tuah hnu khan cun, hi hna (pro-Russians) pawl hi ‘lainawng’ (Ukraine) hna kut i chanh ding taitai in Russia hi kan lungthin a chiakha lo, tiin Putin nih a chim.

Ukraine ram chung Donbas, Kherson le Zaporizhzhia pengkulh i mipi hna an biachahnak hi Russia nih kan dirpi lai, tiah Putin nih a chim. Cu ti a si ah cun, tutan i Ukraine ram lak a timhmi hi 15% tluk kau a si lai, tinak a si.

Kai tinhmi cu Donbas pengkulh ‘chanhchuah’ hi a si i, mah hi pengkulh i khua a sami tam u nih cun Kyiv uknak tangah um an duh ti hna lo, tiin Putin nih a chim.

Mah hi bantuk Referendum hi cu phung he ai kalh i, vote an lak mi zong hi lih in a si te lai, tiin Ukraine le Nitlak ram nih an chim.

Be the first to comment

Leave a Reply

Your email address will not be published.


*